شكلك رومانسي.. بس مش قوي!

كتير من الرجالة ساعات بيندهشوا ويستغربوا ويسألوا نفسهم ليه مالهمش أي حظ مع البنات أو الستات.. بيلاقوا اجابات كتيرة عن السؤال ده بس قليل منهم اللي بيوصلوا للسبب الرئيسي اللي بيخلي أي بنت تفكر ميت مرة قبل ما تفكر ترتبط.. السبب ده هو الرومانسية اللي اكيد أي حد مالوش حظ في حكاية الحب يبقي مفتقد للرومانسية ولازم ياخد كورس مكثف فيها علشان يقدر يستعد لها.. ويبقي رومانسي.. معانا دلوقتي شوية نماذج لناس ما عندهاش أي احساس بالرومانسية واكيد بيقعوا ضحايا ابتعاد المرأة عنهم.. اوعي تكون منهم.
أول نموذج هو اللي تلاقيه حاطط شمعة واحدة علي العشاء علشان يوفر الكهربا!.. هو حاسس إن الشموع بتعمل جو شاعري ورومانسي بس مش فاهم إن البخل في الشموع معناه البخل في الرومانسية!
النموذج الثاني تلاقيه دايماً مشغول عن شريكة حياته وفين وفين لما يسأل عنها أو يتصل بيها ولو سألته.. يقولها مشغول علشان أبني مستقبلي ومستقبلك معايا.. بس ده مش تفسير مريح لأي واحدة لأنها اكيد محتاجة مشاركتك معاها في أي حاجة حتي الحاجات الصغيرة.. حاول مرة تنزل معاها السوق تشتري حاجات البيت وشوف الفرق ساعتها هاتشوف معني الرومانسية!
النموذج الثالث تلاقيه بيختار هدايا غريبة جداً يعني ممكن يشتري غسالة أو مكوة وبينسي إنه لازم الهدية يكون فيها شوية خصوصية!
آخر نموذج معانا هو اللي مقضي الحياة ومش فارقة معاه أي حاجة يعني ممكن يضرب ميعاد مع حبيبته علشان كان سهران مع أصحابه أو ياخدها في فرح ويسيبها مع الستات ويروح هو يرقص ويعيش حياته.. نفس البني آدم ده هو اللي ها يحتفل بعيد زواجه علي القهوة!