جريمة .. في سبت الغسيل!

تابعوا معانا أحدث أفلام الصيف.. الفيلم نزل بدري شوية علشان يشوفوا رد فعل الجمهور ولو ما عجبش حد احتمال يحولوه مسلسل أو نشرة أخبار حملة.. خليكوا معانا في "جريمة في سبت الغسيل".
المشهد الأول
"في منزل غريب"
غريب: ادعيلي ياما دعوتين حلوين عشان هاشتغل في السيما.
الأم: يجعلك نجم شباك والناس كلها عايزاك.. ولا يضايقك حد من الجمهور ولا ممثل مغمور.. ويرزقك بمنتج متريش ويدفعلك من جيبه ويكبش.
المشهد التاني
"في موقع التصوير"
المخرج: عارف دورك يا غريب.. أول ما الحرامية يضربوا البطل ويقول الحقوني هاتخش انت وتسأله علي الساعة.
غريب: وهو بينضرب هاسئله الساعة كام؟!
المخرج: تمام.. هايرد عليك ويقول لك الساعة واحدة وماشية غلط.. ياللا نبدأ يا جماعة.. استاند باي.. 3 .. 3 .. 1
رجل الكلاكيت: فيلم "جريمة في سبت الغسيل" أول مرة..
المخرج: أكشن..
حرامي 1: طلع اللي في جيبك من سكات بدل ما قطعك حتت..
البطل: تقطع مين أربع تربع يا عم انت بتكلم برتقالة..
حرامي 2: معاك موبايل يلا..
البطل: لا ما باشيلش موبايل ماشي بتليفون البيت "صوت رنة موبايل"
حرامي 3: أمال إيه اللي بيرن ده يلا..
البطل: دا يظهر ابن الجيران بيتصل..
حرامي 1: دا طلع دمه خفيف اضربوه يا رجاله..
"صوت تلطيش"
البطل: اااااااه الحقوني.. الحقوووووني..
غريب: معلش يا أستاذ كنت باربط الجزمة..
المخرج: ياللا تاني 3 .. 3 .. 1
رجل الكلاكيت: جريمة في سبت الغسيل تاني مرة..
المشهد التالت
"في بيت غريب"
الأم: ربنا يفك لسانك يا لفيق يابني.. أنا حلمت بيه النهارده وكان ماشي علي أسفلت أحمر..
الأب: الواد ابنك هايعدي يا زينب.. الاسفلت الاحمر ده تنايه عن السجاده الحمرا.. ابشري يا وليه.
ابنك هايخش مهرجان كان.. ولو ملحقوش يخش مهرجان مكنشي..
المشهد الأخير
"في موقع التصوير"
المخرج في عصبية: حد يغير لي البني آدم ده..
غريب: ليه بس ياسطي مالك فيه إيه..
المخرج: انت غبي.. بقالنا أربع تاشر مرة بنعيد عشانك
غريب: معلش.. أصل دي أول بطولة مطلقة ليا ولازم استغلها.
المخرج: بطولة إيه يابني دا هما كلمتين.. لو غلط تاني هاخليهم يطوحوك برا الاستديو.
رجل الكلاكيت: فيلم جريمة في سبت الغسيل ستاشر مرة أنا اتخنقت..
حرامي 2: معاك موبايل يلا..
البطل: لا معييش واللي هايرن ده ابن الجيران وياللا خلصوا واضربوا بقي..
حرامي 3: دا طلع دمه خفيف يا رجاله اضربوووووووه
البطل: الحقوووووني... الحقوووووني... باقول الحقوني..
غريب بصوت عالي: اخش دلوقتي يا أستاذ..
المخرج في غضب: طلعوا الكلب ده برا.. برااااااااا
غريب: ليه كده محدش عايز يديني فرصتي.