سحلول بينفض .. وسحلولة اتجننت!

سحلول: إزيك يا سحلولة وحشتيني قوي يا مضروبة!
سحلولة: سحلولي وحشتني قوي يا مقصوف الرقبة.. فينك كل ده.. مفيش حتي ميسد كوول!
سحلول: معلش يا روحي أصلي كنت مشغول قوي!
سحلولة: خير.
سحلول: خير طبعاً.. أصل كان عندي واوا في رجلي!
سحلولة: يا خراشي.. بعد الشر عليك.. يا رب أنا مش أنت يا سحلولي.. أنا بحبك قوي يا عبيط!
"سحلول وشه احمر"
سحلول: عبيط .. أنا عبيط!
سحلولة: أيوه.. انت ما تعرفش إن الحب بيزيد مع الشتيمة وبيقرب الناس أكتر!
سحلول: أيوه سمعت المعلومة دي.. مش تقولي من الأول.. بحبك يا هبلة!
سحلولة: هه هه هه.. وأنا كمان بحبك يا عبيط بس قولي بقي هاتتقدم لي إمتي..؟
سحلول: قريب ما تخافيش.. بس بابي علطول مسافر ومامي مش فاضية.. بس هانت وهافتح معاهم الموضوع. وكمان انتي ليه مستعجلة ما إحنا مع بعض أهو يامجنونة!
سحلولة: أيوه بس برضه لازم يحصل تجديد.. لبس دبل.. أي حاجة كده.. إحنا بقالنا خمس سنين مع بعض.
سحلول: متخافيش.. هانت.
سحلولة: كل شوية تقولي هانت هانت.. لا.. حدد لي بقي ميعاد.. زهقت!
سحلول: يا هبلة بقولك هانت.. إفهمي بقي.. تشاو أحسن بابي قرب ييجي من السفر علشان أستقبله وأقول له علي الموضوع علطول.
سحلولة: بجد هاتقول له.. وأنا هابقي عروسة.
سحلول: اكيد.. بس سيبيني أمشي بقي.. ياللا باي.
"ومشي سحلول وغاب عن الوجود وفضلت سحلولة تبحث عنه يمين شمال وفوق تحت من غير أي أمل في رجوعه".
وكالعادة جات لها حالة نفسية. وراحت العباسية!
من مجله حريتى

تقبلوا تحياتى
ممكن تصوتوا لى فى المسابقه اذا اعجبكم الموضوع
__________________