اوعي تخسري ..أعز صديقاتك!

[kimo_online]

هتلاقيها في النادي أو الجامعة أو المدرسة أو حتي في البيت قاعدة سرحانة وزعلانة وما حدش عارف إيه الحكاية بالظبط.. لما هاتيجي تحاصرها وتسألها إيه اللي حصل هاتقولك بمنتهي البساطة خسرت أعز صديقاتي! هاتواسيها شوية وتقولها حاولي ترجعي العلاقات وتصلحي اللي انكسر ها تقولك مستحيل دي حلفت إنها عمرها ما تعرفني تاني! تقولها للدرجة دي تقولك أيوه.
هاتسألها ببساطة انتي عملتي إيه علشان تخسريها كده..مش ها ترد عليك أو هاتقولك مش عارفة.. إحنا في "روش طحن" عارفين من غير هي ما تحكي.. ببساطة اكيد عملت حاجة من الحاجات اللي ها نقولها دلوقتي ولو ده حصل تبقي في ثانية بتخسري كل صديقاتك وممكن جدا للأبد.
ــ الغيرة الزائدة.. اوعي عمرك توصلي بغيرتك من صاحبتك لحد درجة الحقد أو حتي تغيري عليها لدرجة تخنقها يعني ما ينفعش تفضلي محاصراها ومتحكمة فيها علشان تبقي صاحبتك انتي بس!
ــ الهدايا.. خلي بالك مش كل ما تشوفي حاجة تعجبك تقولي لنفسك أجيب لصاحبتي زيها.. اكيد ها تعملي ده بحسن نية بس بعد شوية ها تخوفيها منك وهتحس إنك مش فاهمة حاجة!
ــ مش كل يوم تفتح الايميل بتاعها تلاقي رسالة معايدة بتقول إنك بتحبيها وتموت فيها بعد شوية ها تحس ناحيتك بالملل!
ــ لو حصلت بينكما مشكلة واجهيها بنفسك ومش لازم تروحي تجيبي واسطة أو واحدة مشتركة بينكما علشان تصلح اللي حصل..
ــ اوعي تذيعي سـر هي أمنتك عليه.. تبقي كارثة لو ده حصل.. ها تخسريها من غير كلمة عتاب!
ــ حاسبي جداً وانتي بتسألي صاحبتك الانتيم علي أي حاجة معاها وانتي بتحبيها.. ممكن تحس إنك مستكثرة عليها الحاجة دي أو بتحسديها عليها.
ــ بلاش كل ساعة تكلميها علشان تحكي لها القطة بتاعتك عملت إيه والكلب اللولو اللي عند الجيران أخباره إيه؟ .. مش كل المكالمات بتنمي العلاقة بينكما.
ــ خلي بالك كمان من معاملتك معاها واوعي تخليها تحس إنك عايزة تسيطري عليها وتخليها تابعة ليكي في كل حاجة حتي لو كان بحسن نية ها تكسر هي الطوق اللي حطاه في رقبتها وتسيبك لوحدك!
ــ آخر حاجة مهمة اوعي كل شوية تزوريها من غير ميعاد واختاري دايما مواعيد مناسبة للزيارة وكلميها قبل ما تفتح الباب تلاقيكي قدامها!


الرجاء اذا نقل الموضوع فاذكرو صاحب الموضوع